Welcome to Qaraqalpaqstan Respublikası statistika basqarması   Click to listen highlighted text! Welcome to Qaraqalpaqstan Respublikası statistika basqarması Powered By GSpeech
Biz hám

Tashkent qalasında Oraylıq Aziya mámleketleri basshılarınıń ekinshi Másláhát ushırasıwı baslandı.

Sammit jumısında Ózbekstan Respublikası Prezidenti Shavkat Mirziyoev, Qazaqstan Respublikasınıń Birinshi Prezidenti – Elbası Nursultan Nazarbaev, Qırǵızstan Respublikası Prezidenti Sooronbay Jeenbekov, Tájikstan Respublikası Prezidenti Emomali Rahmon hám Túrkmenstan Prezidenti Gurbanguli Berdimuhamedov qatnaspaqta.

Delegaciyalar basshılarınıń birgelikte súwretke túsiw máresimi bolıp ótti.

Keyin mámleket jetekshileriniń tar sheńberdegi ushırasıwı bolıp ótti. Onda Ózbekstan Prezidenti Shavkat Mirziyoev shıǵıp sóyledi.
Mámleketimiz basshısı kásipleslerin qızǵın qutlıqlap, bul ushırasıw turmıslıq talaptı, táreplerdiń jaqsı qońsıshılıqtı bekkemlew hám sheriklikti keńeytiwge umtılısınıń kórinisi ekenin atap ótti.

Oraylıq Aziya mámleketleri basshılarınıń siyasiy erk-ıqrarı hám birgeliktegi háreketleri sebepli sońǵı jıllarda kóplegen quramalı máselelerge sheshim tabıldı. Bul unamlı ózgerisler xalqımız tárepinen qollap-quwatlandı jáne pútkil dúnyada joqarı bahalandı.

Sonıń menen birge, tez ózgerip atırǵan dúnyada jańadan-jańa máseleler kún tártibine shıqpaqta. Regionallıq qáwipsizlikke qáwipler, turaqlı rawajlanıwǵa kesent etetuǵın faktorlar payda bolmaqta. Bul óz-ara isenimge tiykarlanǵan sheriklikti bekkemlewdi, iygilikli is-háreketlerdi muwapıqlastırıwdı talap etpekte.

Jetekshilerdiń bul ushırasıwı joqarı dárejedegi regionallıq baylanıstı sapa jaǵınan jańa basqıshqa alıp shıǵadı.
-Jaratqannıń inayatı menen biz qońsılarmız. Xalıqlarımızdıń tariyxı hám táǵdiri, keleshegi tıǵız baylanıslı. Bul bolsa regionımızdı birlestiretuǵın úlken kúsh bolıp esaplanadı,-dedi Shavkat Mirziyoev.

Mámleketimiz basshısı Oraylıq Aziyada kóp tárepleme birge islesiw boyınsha birden-bir kóz qarastı kelisiw zárúrligin atap ótip, onıń tiykarǵı baǵdarları haqqında óz pikirlerin bildirdi, bir qatar áhmiyetli baslamalardı alǵa qoydı.
Bul, bárinen burın, sawda-ekonomikalıq hám investiciyalıq baylanıslardı rawajlandırıw bolıp tabıladı. Úlken bazarǵa iye, tábiyǵıy shiyki zat hám insan resursları salmaqlı bolǵan regionımızdıń básekige shıdamlı ústinliklerin ilajı bolǵanınsha tolıq iske qosıw áhmiyetli bolıp esaplanadı. Qosımsha qun shınjırın qáliplestiriw, region ishindegi sawdanı keńeytiw, jumıs orınların jaratıw maqsetinde ekonomikanıń túrli tarmaqlarında jańa imkaniyatlardı anıqlaw hám kooperaciyalıq joybarlardı ámelge asırıw kerek.
Ózbekstan awıl xojalıǵı mashina qurılısı, avtomobil qurılısı, elektrotexnika, toqımashılıq sanaatı, agrar tarmaqta belsene birge islesiwge tayar ekeni bildirildi.

Prezidentimiz usı maqsette Tashkentte Oraylıq Aziya mámleketleriniń investiciyalıq forumın shólkemlestiriw, sawda-sanaat palataları basshılarınıń ushırasıwların hár jılı ótkeriwdi usınıs etti.

Ekinshi áhmiyetli baǵdar –regionnıń transport jaǵınan óz-ara baylanıslıǵın bekkemlew hám tranzit potencialın júzege shıǵarıw.
Oraylıq Aziyanıń transport sisteması jaratılıp atırǵan zamanagóy logistikalıq infrastrukturadan paydalanǵan halda region ishinde úzliksiz kommunikaciyanı támiyinlewi, sonday-aq, barǵan sayın artıp baratırǵan tranzit aǵımlarına nátiyjeli xızmet etiwi kerek ekenligi atap ótildi.

Transport kommunikaciyaları boyınsha regionallıq keńestiń dúziliwin, Oraylıq Aziya transport sistemasın birgelikte rawajlandırıw boyınsha baǵdarlama hám kelisimniń dúziliwin tezletiw áhmiyetli ekenligi atap ótildi.

Úshinshiden, regionımızdıń uzaq múddetli máplerin esapqa alǵan halda energetika tarawındaǵı birge islesiwdi keńeytiw zárúrligi, Ózbekstan qayta tiklenetuǵın energiya dárekleriniń úlesin arttırıw, zamanagóy energetika infrastrukturasın jaratıw baǵdarındaǵı birgeliktegi joybarlardı ámelge asırıwǵa tayar ekeni atap ótildi.

Mámleketlerimizdiń úlken turizm potencialın ámelge asırıw jáne bir perspektivalı baǵdar bolıp esaplanadı. Mámleketimiz basshısı onıń ushın Oraylıq Aziyanıń birden-bir, kópshilik tanıytuǵın turizm brendi, region ushın ulıwmalıq bolǵan tartımlı turizm ónimlerin qáliplestiriw kerek ekenine itibar qarattı.

Usı maqsette Prezidentimiz «Oraylıq Aziya boylap sayaxat» xalıqaralıq turizm konferenciyasın ótkeriw usınısın bildirdi.

Shavkat Mirziyoev suwdan paydalanıw baǵdarındaǵı mashqalalardı sheshiwge baylanıslı óz-ara kelisilgen kóz qaraslardı islep shıǵıwdı usınıs etti, Awǵanstanda tınıshlıq, milliy kelisim hám ekonomikalıq tikleniwge erisiwge járdemlesiw jolında region mámleketleriniń iygilikli is-háreketlerin muwapıqlastırıw áhmiyetli ekeni atap ótildi.

 

ÓzA

Tugmani bosing Tinglash