Prezident Shavkat Mirziyoev 22-fevral kúni Nawayı wálayatında jáne gidroenergetika tarmaǵında ámelge asırılatuǵın investiciyalıq joybarlardıń prezentaciyası menen tanıstı.

Nawayı wálayatı – sanaatlasqan aymaq. Taw-kán, ximiya, qurılıs materialları hám toqımashılıq tarmaqları wálayat ekonomikasınıń «drayver»leri bolıp esaplanadı. Bul jerde jılına 65 trillion sumnan aslam sanaat ónimleri islep shıǵarıladı.

Usı jılı Nawayı wálayatında 576 joybardıń ámelge asırılıwı jobalastırılǵan. Olardıń ulıwma bahası 18 trillion 600 milliard sum. Tarawlar kesiminde aytqanda, joybarlardıń 200 i sanaat, 179 ı xızmet kórsetiw, 197 si awıl xojalıǵı tarmaqlarında. Bulardıń nátiyjesinde derlik 18 trillion sumlıq óndiris quwatlılıǵı shólkemlestirilip, 16 mıń jumıs ornı jaratıladı. 123 million dollarlıq importtıń ornın basatuǵın ónim tayarlanıp, 125 million dollarlıq eksport támiyinleniwi názerde tutılǵan.

Atap aytqanda, qurılıs materialları tarmaǵında akril tas, bazalt paneller, aǵash talshıqlı plitalar, pol hám diywal ushın qaplamalar, shiyshe ónimlerin islep shıǵarıw jolǵa qoyıladı. Mısalı ushın, Zarafshan qalasında ayna kárxanasın bıyıl dekabrde iske qosıw rejelestirilgen. Onda 350 adam miynet etedi.

Ximiya sanaatında 20 joybar qáliplestirilgen bolıp, usı jılı 9 ı paydalanıwǵa tapsırıladı. Nátiyjede talap joqarı jańa ónimler ózlestirilip, 430 dan aslam adamnıń bántligi támiyinlenedi.

Toqımashılıq tarmaǵındaǵı joybarlar da perspektivalı. Atap aytqanda, usı jılı barlıq qala hám rayonlarda 28 kárxana shólkemlestirilip, 5 mıń 800ge shamalas jumıs ornı jaratılıwı rejelestirilgen.

Mámleketimiz basshısı joybarlardı sapalı, ilimiy qatnas jasaǵan halda ámelge asırıw, zamanagóy texnologiyalardı tartıp, qosımsha qun jaratıw, básekige shıdamlı ónimler islep shıǵarıp, eksportqa qaratıw boyınsha kórsetpeler berdi.

Ózbekstan Prezidentiniń 2017-jıl 2-maydaǵı qararı menen 2017-2021-jılları gidroenergetikanı bunnan bılay da rawajlandırıw ilajları baǵdarlaması maqullanǵan edi. Bul baǵdarlamaǵa jámi 3 milliard 400 million dollarlıq 65 joybar kirgizilgen bolıp, sonnan 34i jańa quwatlıqlar shólkemlestiriw, 31i barların modernizaciyalawǵa qaratılǵan. Búgingi kúnde 1 mıń 100 megavattlıq 12 joybar iske qosılǵan. 950 megavattlıq jáne 20 joybar juwmaqlawshı basqıshta ámelge asırılmaqta.

Usı jılı ulıwma bahası 1 milliard 420 million dollar bolǵan 16 joybar rejelestirilgen. Atap aytqanda, 11 jańa gidroelektr stanciyası qurılıp, 587 megevatt elektr quwatlılıǵı jaratıladı. Qalǵan 5 joybarǵa bola, bar stanciyalar modernizaciyalanıp, óndiris imkaniyatı  keńeytiledi.

Prezentaciyada tarawdı transformaciyalaw boyınsha ámelge asırılıp atırǵan jumıslar haqqında maǵlıwmat berildi.

Prezident joybarlardı jáne bir márte qayta kórip shıǵıp, sapa jaǵınan jetilistiriw boyınsha kórsetpeler berdi.

ÓzA