01 Dekabr 2022

1-dekabr  Qaraqalpaq tiline mámleketlik til biyliginiń berilgen kúni 1989- jılı áyne usı sánede ana tilimiz – qaraqalpaq tili óziniń mámleketlik til statusına iye bolǵan edi. Búgin tariyxıy waqıyaǵa 33- jıl tolmaqta.

Usı sáne múnásibeti menen Qaraqalpaqstan Respublikası statistika basqarmasında «Tariyxımsań, táǵdirimseń, keleshegimseń - Ana tilim!» atamasında seminar shólkemlestirildi.

 Seminarda qaraqalpaq tiline mámleketlik til biyliginiń beriliw tariyxı, túrkiy tiller sistemasında qaraqalpaq tiliniń mámleketlik til sıpatındaǵı ornı hám búgingi kúnde ushırasıp atırǵan mashqalalar, olardı sheshiw ushın aldaǵı wazıypalar boyınsha Álisher Nawayí atíndaǵí ózbek tili hám ádebiyatí universiteti janíndaǵí mámleketlik tilde is júrgiziw tiykarlarín oqítíw hám qánigeligin arttíríw orayí qaraqalpaqstan respublikasí aymaqlíq bólimi qánigesi A.Qosımbetova sózge shıqtı.

 Bayanatta sóz etilgenindey, házirgi waqıtta dúnyada jeti mıńǵa shamalas tiller bolǵanı menen, olardıń tek 170 ten aslamı óziniń mámleketlik til statusına iye. Olar arasında qaraqalpaq tiliniń bar ekenligi úlken quwanısh hám maqtanısh bolıp tabıladı.

 Qaraqalpaq tiline mámleketlik til biyliginiń beriliwi xalqımızdıń ózligin ańlawı, ǵárezsiz turmısta ómir súriwi hám ata-babalardan miyras bolıp kiyatırǵan milliy miyraslarımız, qádiriyatlarımızdı qásterlep-saqlap, keleshek áwladlarǵa jetkerip beriwdey ullı iste taslanǵan áhmiyetli, tariyxıy qádem boldı.

   Seminar dawamında qatsıwshılar ózlerin qızıqtırǵan sorawlarına juwaplar alıp qızǵın ótkerildi.

Málimleme xızmeti

Click to listen highlighted text! Powered By GSpeech