Aldın xabar bergenimizdey, usı jıldıń 1-iyul sánesinen baslap respublikamızdıń barlıq aymaqların (qala hám rayonları)da xalıqtı dizimge alıw bólimleri sholkemlestirildi. 2023-jılda mámleketimizde ótkeriletuǵın dizimge alıw processlerine tayarlanıw hám ótkeriw ushın óz aymaqları kóleminde tikkeley juwapker etip belgilengen usı bólimlerdiń basshıları hám orınbasarları ushın statistika basqarması tárepinen dizimge alıw jumıslarına tayarlıq kóriwge arnalǵan oqıw seminarları onlayn hám offlayn formatlarda ótkerilip atır.
Mámleketlik statistika komiteti Dizimge alıw processlerin shólkemlestiriw hám ótkeriw basqarması juwapker xızmetkeri Q.Saparov tárepinen Qaraqalpaqstan Respublikası statistika basqarmasında turaq-jaylar dizimin dúziw ushın xızmetkerler (registratorlar)di arnawlı oqıtıwdı shólkemlestiriw máselelerine arnalǵan seminar ótkerildi. Seminarǵa Qaraqalpaqstan Respublikasınıń qala hám rayonlarınıń Dizimge alıw bólimleriniń basshıları hám olardıń orınbasarları qatnastı, olarǵa registratorlardı tańlap alıwdan baslap, atqaratuǵın xızmet wazıypası maydanınan teoriyalıq hám ámeliy kónlikpelerdi túsindiriwge shekem bolǵan processtiń barlıq tárepleri túsindirildi.
Atap aytqanda, aymaqlardı kartalaw, xalıq punktlerindegi úylerdiń dizimin dúziw, xalıqtı dizimge alıwǵa tayarlıqtıń eń tiykarǵı basqıshlarınan biri esaplanadı. Bul wazıypanıń tolıq hám sapalı atqarılıwı, óz gezeginde, dizimge alıw jumıslarınıń nátiyjeli bolıwına imkaniyat beredi. Oqıw-seminar dawamında turaq-jay dizimin dúziwshilerdi jumıs procesine puqta tayarlanıwlarında dizimge alıw bólimleriniń juwapkerligi hám wazıypaları bólek aytıp ótildi.
Málimleme xızmeti