Qaraqalpaqstan Respublikası Ishki isler ministrligi Kiberjınayatlarǵa qarsı gúresiw basqarması tárepinen Qaraqalpaqstan Respublikası statistika basqarması xızmetkerleri ushın kiberqáwipsizlik máselelerine baǵıshlanǵan seminar shólkemlestirildi.
Seminarǵa IIM Kiberjınayatlarǵa qarsı gúresiw basqarmasınıń juwaplı xızmetkeri N. Jumabaev, Qaraqalpaqstan Respublikası statistika basqarması baslıǵı T. Ganiev hám basqarma xızmetkerleri qatnastı.
Ilaj dawamında búgingi kúnde internet tarmaǵı hám málimleme-kommunikaciya texnologiyalarınan paydalanıw procesinde eń kóp ushırasıp atırǵan kiberjınayat túrleri, olardıń júz beriw usılları hám bunday qáwiplerden qorǵanıwdıń nátiyjeli jolları haqqında tolıq maǵlıwmatlar berildi.
Atap aytqanda, seminar qatnasıwshılarına:
Telegram hám basqa messendjerler arqalı tarqatılıp atırǵan zıyanlı APK-fayllar, viruslı siltemeler hám jalǵan mobil qosımshalardıń qáwpi;
- puqaralardıń atına nızamsız túrde onlayn kredit rásmiylestiriw menen baylanıslı aldawshılıq sxemaları;
- jalǵan internet-dúkanlar hám qálbeki tólem betleri arqalı bank kartaları maǵlıwmatların qolǵa kirgiziw jaǵdayları;
- jeke maǵlıwmatlardı qorǵaw, quramalı parollardan paydalanıw hám eki basqıshlı autentifikaciyanı iske qosıwdıń áhmieti boyınsha ámeliy usınıslar berildi.
Seminar juwmaǵında xızmetkerler tárepinen berilgen sorawlarǵa qánigeler tárepinen tolıq juwaplar berildi hám kiberqáwipsizlik qaǵıydalarına qatań ámel etiw búgingi sanlı dáwirdiń áhmietli talabı ekenligi ayrıqsha atap ótildi.
