Ózbekstanda biznesti dizimge alıw ilajın joqarı dárejede shólkemlestiriw hám ótkeriwge tayarlıq jumısları sheńberinde aymaqlarda túsindiriw, úgit-násiyatlaw hám oqıw ilajları izbe-iz dawam ettirilmekte.
Atap aytqanda, usı kúnlerde Qaraqalpaqstan Respublikası statistika basqarmasında taraw xızmetkerleriniń qatnasıwında oqıw seminarı shólkemlestirildi.
Seminarda Ózbekstan Respublikası Prezidentiniń 2026-jıl 10-sentyabrdegi PP-190-sanlı Pármanına muwapıq, usı jıldıń 15-oktyabrinen 30-noyabrine shekem mámleketimizde ótkeriletuǵın biznesti dizimge alıw ilajına tayarlıqtıń áhmietli tárepleri hár tárepleme túsindirildi.
Sonıń ishinde, ilajdıń mazmun-mánisi hám ótkeriw tártibi, biznesti dizimge alıwdıń maqset hám wazıypaları, respondentlerdi qamtıp alıw sheńberi, maǵlıwmatlardı usınıw usılları, sonday-aq, dizimge alıw procesiniń boyınsha tolıq maǵlıwmatlar berildi.
Bunday oqıw seminarları aymaqlarda biznesti dizimge alıw ilajın sapalı hám nátiyjeli shólkemlestiriw, juwapker xızmetkerlerdiń bilim hám kónlikpelerin bekkemlew hám xalıqqa bul processtiń áhmietin keńnen túsindiriwge xızmet etedi.
