Xalıqtı dizimge alıw — ulıwma mámleketlik kólemindegi keń kólemli ilaj, xalıq haqqındaǵı isenimli informaciya deregi. Bunıń nátiyjesinde xalıq sanı, jasaw shárayatı, maǵlıwmatı, tálim dárejesi, bántligi, jası, jınsı, milliy quramı, aymaqlarda jaylasıwı hám basqa social-demografik máseleler haqqında tolıq maǵlıwmatlar jıynaladı. Ámeldegi esapqa kóre, 2024-jıl 1-yanvar jaǵdayına mámleketimiz xalqı sanı 36 million 799 mıń 728 adam al sonnan Qaraqalpaqstan Respublikası xalqı sanı 2 million 2 mıń 668 adamǵa jetti. Mámleket rawajlanıwı jolındaǵı reformalar insan qádirin kótermelew, xalıq dáramatların asırıw hám olarǵa múnásip turmıs shárayatların jaratılıwına qaratılǵan. Biraq xalıq aralıq tájiriybeden belgili, ámeldegi xalıqtıń turmıs tárizi, ekonomikalıq jaǵdayı, bántligi, turaq-jayı, dáramat derekleri hám basqa da sociallıq jónelisler haqqında anıq juwmaq hám de analizler etiwge jetkilikli múmkinshilik bermeydi. Sol sıyaqlı tárepler názerde tutılǵan halda, mámleketimiz basshısınıń 2024-jıl 4-martdaǵı "Ózbekstan Respublikası Prezidenti janındaǵı Statistika agentligi iskerligin shólkemlestiriw ilajları haqqında"ǵı qarar menen tastıyıqlanǵan "Rásmiy statistika tarawında reformalardı tereńlestiriw hám sistema iskerligin transformaciya qılıw boyınsha" "jol kartası" menen mámleketimizde xalıqtı dizimge alıwdı 2025-2026-jıllarda ámelge asırılıwı belgilendi. Qararǵa muwapıq, xalıqtı dizimge alıwǵa tayarlanıw, onı ótkeriw hám nátiyjelerin járiyalaw tómendegi tártipte shólkemlestiriledi. Birinshiden, 2024-2025-jıllarda xalıqtı dizimge alıwdı ótkeriwge tayarlıq kóriledi. Bunda onıń mazmun-mánisin xalıqqa túsindiriw boyınsha úgit-násiyat jumıslarında paydalanıw ushın videorolik, banner, flaer hám bukletlar tayarlanadı. 2021-jılda sınaw tárizinde ótkerilgen xalıqtı dizimge alıw nátiyjeleri hám xalıq aralıq ekspertlerdiń usınısları tiykarında tayarlanǵan sorawlar formaları, "Xalıqtı dizimge alıw" informaciyalıq sistemasın jáne de jetilistiriledi, "STATA" ámeliy dástúriy paketi litsenziyası satıp alınıp, bul boyınsha dizimge alıw nátiyjelerin sáwlelendiriwshi kestelerdiń úlgileri qáliplestiriledi hám de ilajdıń shólkemlestirilgen jobası islep shıǵıladı. Ekinshiden, 2025-2026-jıllarda respublikamızdıń barlıq qala hám rayonlarında xalıqtı dizimge alıwdı ótkeriw jumısları ámelge asıriladı. Sol orında atap kórsetiw kerek, pútkil ilajdı ótkeriw ushın 800 mlrd. som (shama menen 63,4 mln. dollar) aqsha talap etiledi. Úshinshiden, 2026-2027 jıllarda xalıqtı dizimge alıw nátiyjeleri tayarlanadı hám rásmiy daǵaza etiledi.
Málimleme xızmeti