Xalıqtı dizimge alıwdıń tiykarǵı maqseti Ózbekstan Respublikasında xalıq quramınıń jaǵdayı hám rawajlanıw dinamikası haqqında mámleketti social-ekonomikalıq hám social-siyasiy rawajlandırıw tarawındaǵı mámleketlik siyasattıń tiykarǵı baǵdarların belgilew hám ámelge asırıw ushın zárúr bolǵan isenimli hám qalıs málimlemeni alıwdan ibarat.
Xalıqtı dizimge alıwdıń tiykargı wazıypaları nelerden ibarat?
- xalıqtıń densawlıǵın bekkemlew, hayal-qızlar hám balalardıń jasaw sharayatların jaqsılaw, shańaraqlarǵa járdem kórsetiw boyınsha ilajlardı islep shıǵıw maqsetinde xalıqtıń quramındaǵı, mámlekettiń demografiyalıq jaǵdayındaǵı ózgerislerdi bahalawǵa baylanıslı maǵlıwmatlar bazasın keńeytiw;
- qalalardı hám basqa da elatlı punktlerdi social-ekonomikalıq rawajlandırıwdıń, miynet resursların jaylastırıw hám olardan paydalanıwdıń uzaq, orta hám qısqa múddetli prognozları hám baǵdarlamaların tayarlaw;
- xalıqtı dizimge alıwlar aralıǵındaǵı dáwirde xalıqtıń sanı hám quramınıń aǵımdaǵı esabın, esap-sanaqların hám prognozların ámelge asırıw;
- social-ekonomikalıq rawajlandırıw máseleleri boyınsha ilimiy izertlewler ótkeriw.
Xalıqtı dizimge alıw procesi úsh basqıshta ámelge asırıladı.
Birinshisi, tayarlıq basqıshi.
Házirgi kúnde bul tayarlıq jumısları alıp barılmaqta. Máselen: Xalıqtı dizimge alıw haqqında xabardar etiw maqsetinde respublikamızdıń barlıq aymaqlarında jergilikli televidenie hám radioda kórsetiw hám esittiriwler islenip kelinbekte, gazeta hám jurnallarda maqalalar basıp shıǵarılmaqta, máhállelerde, ulıwma bilim beriw mektepleri hám joqarı bilimlendiriw mákemelerinde turaqlı túrde sáwbetleri hám seminarlar shólkemlestirilip kelinbekte.
Ekinshisi, tiykarǵı basqısh bolıp, onda tikkeley xalıqtı dizimge alıw ámelge asırıladı, yaǵnıy xalıqtıń haqqındaǵı maǵlıwmatlar (xalıqtıń demografiyalıq jaǵdayı, jınısı, milleti, jası, maǵlıwmatı) jıynalıp, qadaǵalaw tekseriwi ótkeriledi hám xalıqtı dizimge alıw materialları tapsırıladı. Bul shama menen eki ay múddetti quraydı.
Sońǵı úshinshi basqıshta, alınǵan maǵlıwmatlar analizlenip, nátiyjeler járiyalanadı.
