Ózbekstan Respublikası Prezidentiniń "Xalıq hám awıl xojalıǵın dizimge alıw haqqında"ǵı PP-173-sanlı Pármanınıń orınlanıwın támiyinlew maqsetinde 2026-jılı ótkeriletuǵın xalıq hám awıl xojalıǵın dizimge alıw ilajlarına tayarlıq kórilmekte.
Usı múnásibet penen usı jıldıń 15-oktyabr kúni Qaraqalpaqstan Respublikası statistika basqarmasında xalıq hám awıl xojalıǵın dizimge alıwǵa tayarlıq processlerine arnalǵan oqıw seminarı bolıp ótti.
Seminardı Ózbekstan Respublikası Milliy statistika komiteti Ashıq maǵlıwmatlar portalı bólimi baslıǵı X. Iskandarov hám bólim bas qánigesi B. Djalilov alıp bardı.
Ilajda Qaraqalpaq mámleketlik universitetiniń professor-oqıtıwshıları, respublikalıq máhálle birlespesiniń juwaplı xızmetkerleri, sonday-aq, basqarma, qala hám rayon statistika bólimi xızmetkerleri qatnastı.
Seminar dawamında qatnasıwshılarǵa 2026-jıl 15-yanvardan 28-fevralǵa shekem ótkeriliwi rejelestirilgen Xalıq hám awıl xojalıǵın dizimge alıw ilajınıń maqset hám wazıypaları, dizimge alıw jumısların shólkemlestiriw tártibi, elektron sistemalardan paydalanıw, sorawnama betlerin toltırıw tártibi hám maǵlıwmatlardı qayta islew processleri haqqında tolıq túsinikler berildi.
Sonday-aq, dizimge alıwshılar hám qadaǵalawshılardıń juwapkershiligi, xalıqtıń jeke maǵlıwmatların saqlaw, málimleme qáwipsizligi, xalıq penen sóylesiw mádeniyatı hám úgit-násiyat jumısların nátiyjeli shólkemlestiriw boyınsha áhmiyetli usınıslar berildi.
Ilaj sońında seminar qatnasıwshılarına dizimge alıw procesinde belsene qatnasıw, xalıq arasında túsindiriw jumısların kúsheytiw zárúrligi atap ótildi. Qatnasıwshılar ózleriniń pikir-usınısların bildirip, aldaǵı jumıslar ushın anıq baǵdarlardı belgilep aldı. Berilgen sorawlarǵa qánigeler tárepinen tolıq juwaplar berildi.
Bul oqıw seminarı arqalı juwapker shólkem wákilleriniń bilim hám ámeliy kónlikpeleri bekkemlenip, xalıq hám awıl xojalıǵın dizimge alıw ilajın joqarı dárejede shólkemlestiriw ushın áhmiyetli tiykar jaratıldı.
