Usı jıldıń 21- fevral kúni Mámleketlik statistika komiteti baslıǵı Begalov Batır Abdusalomovich aymaqlıq statistika bólimleri iskerligin úyreniw maqsetinde Qaraqalpaqstan Respublikasına keldi.
Daslep, Qaraqalpaqstan Respublikası statistika basqarması bólimleriniń jumıs iskerligi menen jaqınnan tanısıp, “1-KB jıllıq” - mikrofirma hám kishi kárxanalardıń 2021- jıl ushın esabatı hám “1-FX jıllıq”- fermer xojalıqları iskerligi tuwrısında 2021- jıl ushın statistikalıq esabatlarınıń waqıtında sapalı qabıllaw natiyjeliligin asırıw boyınsha tapsırmalar berdi.
Sonıń menen birge, mámleketimiz basshısınıń “Ózbekstan Respublikasınıń milliy statistika sistemasın jáne de jetilistiriw hám rawajlandırıw ilajları tuwrısında”gi PQ-4796-sanlı qararında belgilengen wazıypalar waqıtında sapalı atqarılıwın hám tuwrı ámelge asırıw boyınsha tiyisli tapsırmalar berildi.
Qaraqalpaqstan Respublikasına sapar dawamında komitet baslıǵı Kegeyli rayonı, Nókis qalasındaǵı oraylıq dıyxan bazarlarında azıq-awqa ónimleriniń bahaların gúzetip, dıyxan bazarındaǵı satıwshı hám isbilermenler menen sáwbetlesdi.
Óz gezeginde, komitet baslıǵı Qaraqalpaqstan Respublikası statistika basqarması Baha statistikası bólimi xızmetkerlerine aymaqlıq oraylıq dıyxan bazarlarında, azıq-awqat ónimleriniń minimal-maksimal bahaları tuwrısındaǵı maǵlıwmatlardı qáliplestiriwde planshetlerden paydalanıw boyınsha óz usınısların berdi.
Bul bolsa óz gezeginde, komitet tárepinen hár ayda qáliplestirilip, daǵaza etiletuǵın Ózbekstan Respublikasınıń inflyaciya dárejesi kórsetkishleriniń obyektiv hám ashıqlıǵınıń jáne de támiyinleniwine xızmet etedi.
Mámleketlik statistika komiteti baslıǵınıń Qaraqalpaqstan Respublikasına saparı dawam etpekte.
Málimleme xızmeti