Usı jıldıń 3- iyun kúni Nókis rayonı № 12-sanlı ulıwma orta bilim beriw mektebi xızmetkerleri qatnasıwında 2023- jılda xalıqtı dizimge alıwdı shólkemlestiriw is ilajları menen xalıqtı xabardar etiw maqsetinde Nókis rayonı statistika bólimi qániygeleri tárepinen seminar ótkerildi.
Seminarda mekteb xızmetkerlerine Ózbekstan Respublikası Prezidentiniń 2019- jıl 5- fevraldaǵı PF-5655-sanlı «Ózbekstan Respublikasında 2022- jılda xalıqtı dizimge alıwdı ótkeriw koncepciyasın tastıyıqlaw haqqında» ǵı Pármanı hámde 2020- jıl 16- marttaǵı ÓRN-611-sanlı “Xalıqtı dizimge alıw haqqındaǵı” Ózbekstan Respublikası Nızamınıń mazmun mánisi túsindirildi.
Ǵárezsizlik jıllarında xalıqtı tolıq dizimge alıw ótkerilmedi. Bul óz gezeginde xalıqtıń sanı, jası, jınısıy quramına keskin tásir kórsetetuǵın ózgerisler, xalıqtıń aymaqlarda jaylasıwı hámde basqada social-demografiyalıq ózine tán bar bolǵan maǵlıwmatlardı qollanıwda sezilerli dárejede sheklewlerge alıp kelip atır edi.
Xalıqtı birden-bir esapqa alıw dáwirinde xalıqtıń jınısı, jası, shańaraq jaǵdayı, maǵlıwmatı, ómir dárejesi, jasaw shárayatı, bántligi, milleti, puqaralıǵı hámde basqa demografiyalıq, social-ekonomikalıq qásiyetleri boyınsha jeke tártipte esapqa alıw hám tolıq xarakterlew maqsetinde Respublikamızda xalıqtı dizimge alıw jumısları alıp barıladı.
Xalıqtı dizimge alıw nátiyjesinde alınǵan kórsetkishler jaqın keleshekte respublika hámde aymaqlardı social-ekonomikalıq rawajlandırıw, xalıqtıń bántligi, hayallar hám balalar salamatlıǵın jaqsılaw, xalıqtıń sociallıq qorǵawǵa mútáj qatlamlarına járdem kórsetiw boyınsha dástúrlerdi mánzilli islep shıǵıwda isenimli maǵlıwmat sıpatında paydalanıladı.
Ózbekstan Respublikası Prezidentiniń 2019- jıl 5 fevraldaǵı PF-5655-sanlı “«Ózbekstan Respublikasında 2022- jılda xalıqtı dizimge alıwdı ótkeriw koncepciyasın tastıyıqlaw haqqında» ǵı Pármanında belgilengen wazıypalardıń orınlanıwın nátiyjeli shólkemlestiriw, xalıqtı dizimge alıwdı shólkemlestiriw hám metodikalıq principlerin, dástúriy-texnikalıq támiyinlew hám maǵlıwmatlardı qayta islewdiń texnologik processlerin sınawdan ótkeriw, mámleketlik, xojalıq hám jergilikli hákimiyat organları basshılarınıń juwapkershiligin arttırıw maqsetinde Ózbekstan Respublikası Ministrler Kabinetiniń usı jıl 11- noyabr kúngi №710-sanlı qararı menen xalıqtı dizimge alıw jumısları 2023- jılǵa kóshirilgeni maǵlıwmat ushın aytıp ótildi.
Qaraqalpaqstan Respublikası statistika
basqarması málimleme xızmeti