Mámleket puqaraları haqqindaǵı maǵlıwmatlar hár qanday mámlekettiń milliy statistikasınıń zárúrli bólegi esaplanadı. Bunday maǵlıwmatlar málim waqıt aralıǵında xalıqtı dizimge aliw ilajları arqalı toplandi. Olar tek ǵana respublika emes, bálki Jer júzi xalqınıń sanı, social jaǵdayı, dáramatları sıyaqlı bir qansha zárúrli informaciyalardı esaplap barıwǵa xizmet etedi. BMSh dúnya mámleketlerine puqaralar menen júzege keliwshi bir qatar social mashqalalardıń sheshimi hám de ekonomikalıq kórsetkishlerdiń demografiyalıq kórsetkishler menen proporcional túrde ósip barıwın támiyinlew ushın hár on jılda keminde bir márte xalıqtı dizimge alıw ilajın ótkeriwdi usınıs etedi. Biraq, Mámleketimizde ǵárezsizlikten keyin keń kólemde xalıqtı dizimge alıw ilajı ótkerilmegen. Sol sebepli, mámleketimizde dáslepki márte ótkeriliwi názerde tutılg'an xalıqti dizimge alıw ilajına házirgi waqıtta qızǵın tayarlıq kórilmekte. Bul ilajlardıń áhmiyetli tárepi sonda, olar arqalı tek ózimizg'ana emes, bálkim keleshek áwlad ushın zárúrli maǵlıwmatlardı toplawǵa erisemiz. Xalıqtı dizimge alıw nátiyjeleri mámlekettiń keyingi demografiyalıq jáne social siyasatın belgilew menen birge, respublika hám aymaqlardı socialliq-ekonomikalıq rawajlandırıw prognozları hám de dástúrlerin dúziwde keń qollanıladı. Keyingi on jıllıqqa mólsherlengen shańaraqlardı qollap –quwatlawǵa qaratılǵan social dástúrlerdi qáliplestiriw, emlewxanalar, balalar baqshaları, mektepler hám úy-jay qurılısın joybarlawda paydalanıladı. Dizimge alıw nátiyjesinde qáliplestiriletuǵın mámlekettegi jumıs beriwshiler haqqindaǵı maǵlıwmatlar jeke isbilermenlikti rawajlandırıw hám xoshametlewge jol ashadı. Biznes wákilleri dizimge alıw maǵlıwmatları arqalı miynet hámde tutınıw bazarınıń jaǵdayın bahalaw, talap hám usınıslar zárúriyatın anıqlaw múmkinshiligine iye boladı. Bir sóz benen aytqanda, xalıq haqqında toplanatuǵın maǵlıwmatlar barlıq tarawlardı rawajlandırıp, mámleketti jáne de rawajlanıwına, jáhán maydanında Jańa Ózbekstannıń jańasha túsin sáwlelendiriwshi faktor bolıp xızmet etedi.
Málimleme xızmeti