Korrupciya - jámiet hám onıń rawajlanıwına tosqınlıq etetuǵın eń awır illetlerden biri bolıp esaplanadı. Bul mashqala adamlar arasında kóp dodalanıp atırǵan temalardan biri bolıp qalmaqta.
Korrupciya sonday illet, onı bir yamasa eki uyımnıń háreketi menen joq etip bolmaydı. Barlıq puqaralarımız, jámietimiz oǵan qarsı birgelikte gúresip, onıń tamırların joq etiwge kiriskense ǵana unamlı nátiyjege erisiw múmkin. Keyingi jılları mámleketimizde korrupciyaǵa qarsı gúresiw, onıń aldın alıw boyınsha izbe-iz reformalar ámelge asırıldı. Ásirese, bul baǵdarda óz aldına agentliktiń shólkemlestiriliwi, mámleketlik satıp alıwlar, tenderler, júzlegen mámleketlik xızmetlerdiń elektron hám ashıq-aydın túrge ótkerilgeni óz nátiyjesin bermekte. Prezidentimiz tárepinen korrupciya máselesine ayrıqsha itibar qaratılıp, jámietimizde óziniń hár qıylı kórinisleri menen rawajlanıwımızǵa tosqınlıq etip atırǵan korrupciya illetiniń aldın alıw boyınsha belgili jumıslar islenbekte. Bul biykarǵa emes, álbette. Mámleketimiz basshısı aytqanınday, bul jawız báleniń aldı alınbasa, haqıyqıy isbilermenlik hám investiciyalıq ortalıqtı jaratıw múmkin emes, ulıwma, jámiettiń birde-bir tarmaǵı rawajlanbaydı.
