Xalıqtı dizimge alıwdıń baslanǵısh maǵlıwmatlar sisteması Ózbekstan Respublikası aymaǵında bir pútin hám hár bir hákimshilik-aymaqlıq birlik boyınsha anıq bir waqıtta jasaytuǵın shaxslardıń túrli sıpatlamaları haqqında xalıq-aralıq salıstırıla alatuǵın isenimli, qalıs hám pútin maǵlıwmatlardı birden-bir statistikalıq usıllar tiykarında jıynaw, qayta islew, tallaw, redaktorlaw, ulıwma maǵlıwmatlardı qáliplestiriw hám xalıq haqqındaǵı maǵlıwmatlardı operativ qáliplestiriw maqsetinde islep shıǵıldı.
Tómendegiler málimleme sistemasın islep shıǵıwdıń tiykarǵı maqsetleri sıpatında esapqa alındı:
- xalıqtıń quramındaǵı global ózgerislerdi bahalaw, demografiyalıq siyasattı, xalıqtıń densawlıǵın bekkemlew, hayal-qızlar hám balalardıń jaǵdayın jaqsılaw hám shańaraqlarǵa járdem kórsetiw ilajların islep shıǵıw ushın málimleme bazasın keńeytiw;
- elatlı punktler hám qalalardıń infrastrukturasın rawajlandırıw, miynet resurslarınan paydalanıw hám olardı jaylastırıw boyınsha qısqa, orta hám uzaq múddetli prognozlar, baǵdarlamalar tayarlaw hám indikativlik rejelestiriw;
- milliy turaqlı rawajlanıw maqsetlerin qáliplestiriw hám onıń ámelge asırılıwı ústinen monitoring ótkeriw;
- xalıqtı dizimge alıw dáwirleri aralıǵında xalıqtıń sanı hám quramınıń aǵımdaǵı esabın júrgiziw, xalıqtıń sanın esaplaw hám prognozların ámelge asırıw ushın statistikalıq bazanı jaratıw;
- social-ekonomikalıq mashqalalar boyınsha ilimiy izertlewlerdi ámelge asırıw.
Xalıqtı dizimge alıw mámlekette jasap atırǵan barlıq xalıqqa tiyisli demografiyalıq, ekonomikalıq hám sociallıq maǵlıwmatlardı jıynaw, ulıwmalastırıw, bahalaw, tallaw hám járiyalawdıń birden-bir procecsin óz ishine alǵan halda, xalıq haqqındaǵı maǵlıwmatlardıń tiykarǵı dáregi esaplanadı hám ol kelesi 10-30 jılǵı rawajlanıwdıń prognoz kórsetkishlerin esaplaw ushın isenimli tiykar jaratadı.
Aymaqlardı rawajlandırıw hám jámiettiń sociallıq qorǵawǵa mútáj qatlamlarına járdem kórsetiw boyınsha siyasiy hám basqarıw qararların qabıl etiw ushın zárúr maǵlıwmatlardı alıw imkaniyatın beredi. Ol xalıqtıń sanın isenimli esaplaw, sonday-aq, anıq belgilengen birden-bir esapqa alıw dáwirinde xalıqtıń jınısı, Jas, shańaraqlıq jaǵdayı, bilim dárejesi, jasaw sharayatı, bántligi, milleti, puqaralıǵı hám basqa da demografiyalıq hám social-ekonomikalıq ózgeshelikleri boyınsha jeke tártipte esapqa alıw hám tolıq táriyplewdiń universal usılın iske qosqan halda rásmiy statistika sistemasında tiykarǵı rol oynaydı.